Канцеларијата на Обединетите нации за проектни услуги (УНОПС), во соработка со Комората на овластени архитекти и овластени инженери, организира Форум со добавувачи, со цел унапредување на соработката со локалните компании, инженерски организации и самостојните инженери во земјата.
Форумот е наменет за инженерски компании, проектантски бироа, фирми за енергетска ефикасност и изведувачи заинтересирани за соработка со УНОПС на иднијавни набавки и проекти во рамки на проектот ЕУ за чист воздух (EU for Clean Air) — проект што УНОПС го спроведува со финансиска поддршка од Европската Унија.
Посебен акцент ќе биде ставен на идните тендери за оптимизација и модернизација на системите за греење во јавни објекти и нивно преминување на почисти извори на енергија, како и други активности поврзани со намалување на загадувањето на воздухот и подобрување на енергетската ефикасност.
Преку форумот, учесниците ќе имаат можност да:
- Се информираат за претстојните можности за соработка со УНОПС;
- Добијат насоки како да станат добавувачи на системот на Обединетите нации и како да ја користат платформата UN Global Marketplace (UNGM);
- Се запознаат со процедурите и критериумите за учество во тендерите;
- Ја зајакнат својата конкурентност и да се подготват за идни повици во рамки на проектот ЕУ за чист воздух и други УНОПС иницијативи.
Форумот претставува можност за воспоставување директен контакт со УНОПС, размена на информации и градење долгорочна соработка со цел поттикнување на одржливи, енергетски ефикасни и чисти решенија во јавниот сектор.
